മനസ്സ് പ്രക്ഷുബ്ധമാണ്...
ഇന്നലെ വരെ എന്ത് സുഖമായിരുന്നു...
"ഹായ് , ആര് യൂ മാരീഡ്?"
"നോ, നോ, ഐയാം എ ബാച്ചി"
"ബാച്ചി???"
"യെസ്സ്, ബാച്ചി"
കൊച്ചി, പിച്ചി എന്നൊക്കെ പറയുന്ന പോലെ ബാച്ചി!!!
പറയാനും, കേള്ക്കാനും ഇമ്പമുള്ള വാക്ക്.
ഓഫീസില് ചെല്ലുമ്പോള് ബോസ്സ് 'എന്താടാന്ന്' ചോദിച്ചാല് 'നീ പോടാന്ന്' പറയാനുള്ള ചങ്കൂറ്റം, ഇനി ഇവിടെ ജോലി ചെയ്യേണ്ടാന്ന് എച്ച്.ആര് പറഞ്ഞാല്, 'ചുവന്ന നൈലോണ് സാരിയില് നിങ്ങള് സുന്ദരിയാണെന്ന്' സൂചിപ്പിക്കാനുള്ള മഹാമനസ്ക്കത,
ഇത്രേം ശമ്പളമേ തരൂന്ന് കമ്പനി പ്രഖ്യാപിച്ചാല് 'ഐ ഡോണ്ട് ലൈക്ക് ദിസ്സ് ഡേര്ട്ടി കമ്പനി' എന്ന് വിളിച്ച് കൂവാനുള്ള ആര്ജ്ജവം, എന്നിങ്ങനെ എണ്ണപ്പെട്ട കഴിവുകള് ഈ ബാച്ചി ലൈഫില് എന്നോടൊപ്പം ഉണ്ടായിരുന്നു.
പക്ഷേ കല്യാണം കഴിഞ്ഞതോടെ എല്ലാം കീഴ്മേല് മറിഞ്ഞു...
ഓഫീസില് ഇനി ഞാൻ ഒരു മര്യാദരാമന് ആയിരിക്കും.
എന്നും രാവിലെ സഹധര്മ്മിണിയുടെ ആവലാതികള്..
"ഇക്കാ , ഉപ്പില്ല, മുളകില്ല, പാലില്ല, തൈരില്ല...."
വൈകിട്ട് കൊണ്ട് വരാമേ!!!!
ഓഫീസില് പ്രോജക്റ്റ് മാനേജരുടെ അന്വേഷണങ്ങള്..
"അത് ചെയ്തോ? ഫീൽഡിൽ പോയോ? ആപ്ലിക്കേഷന് എവിടെ?"
ഇപ്പോ ചെയ്യാമെ !!!
ഇടക്കിടെ എച്ച്. ആര് (കമ്പനിയിലെ ഏറ്റവും സുന്ദരി) വരും..
കുണുങ്ങി കുണുങ്ങിയുള്ള വരവ് കാണുമ്പോള് ഊഹിച്ചോണം, ഇട്ടിരിക്കുന്നത് പുതിയ ഡ്രസ്സാ.അതിനെ പറ്റിയുള്ള അഭിപ്രായം അറിയാനുള്ള വരവാ.നമ്മളായിട്ട് എന്തിനാ കുറക്കുന്നത്, വെറുതെ വച്ച് കാച്ചി:
"മേഡം, ഈ ഡ്രസ്സില് സുന്ദരി ആയിരിക്കുന്നു"
അവരൊന്ന് വെളുക്കെ ചിരിച്ചു, എന്നിട്ട് പരിഭവത്തോടെ ചോദിച്ചു:
"എന്താ , ഈ ഡ്രസ്സിടുമ്പോള് മാത്രമാണോ ഞാന് സുന്ദരി ആയത്?"
'അയ്യോ അല്ലേ, ഡ്രസ്സൊന്നും ഇട്ടില്ലെങ്കിലും മാഡം സുന്ദരിയാണേ' എന്ന് പറയാന് വന്നത് മനപൂര്വ്വം വിഴുങ്ങി, പകരം ഒരു ചിരി ചിരിച്ചു, , അത്രമാത്രം.
വൈകിട്ട് വീട്ടിലെത്തി സഹധര്മ്മിണിയോട് ഈ തമാശ ഉണര്ത്തിച്ചു, എല്ലാം കേട്ടപ്പോള് അവളും പൊട്ടിച്ചിരിച്ചു.തുടര്ന്ന് കിരണ് ടീവി ഓണ് ചെയ്തു കൊണ്ട് ഊണ് കഴിക്കാന് ഇരുന്നു.വിഷമങ്ങള് മറന്ന് പൊട്ടിച്ചിരിക്കാന് ഒരു മലയാളം പടം..
ദിലീപിന്റെയും ഹരിശ്രീ അശോകന്റെയും തമാശകള് കണ്ട്കൊണ്ട്, ചോറും ചിക്കൻ കറിയും കൂട്ടി കുഴച്ച് വലിയൊരു ഉരുള വായിലേക്ക് വച്ചപ്പോള് സഹധര്മ്മിണി ചോദിച്ചു:
"എച്ച്. ആറിലെ ആ പെണ്ണ് അത്ര സുന്ദരിയാണോ?"
ഗ്ലും!!!!
ഉരുള അറിയാതെ വിഴുങ്ങി പോയി!!!
അല്ലാഹ്, പണിയായോ??
"ആണോ ഇക്കാ, സുന്ദരിയാണോ?"
ആയി, പണിയായി!!!
ശെടാ, ഒന്നും വേണ്ടായിരുന്നു.
ഒടുവില് അവള്ക്ക് സമാധാനമാകട്ടെ എന്ന് കരുതി പറഞ്ഞു:
"ഹേയ്, ഇന്ന് ആ ഡ്രസ്സില് കൊള്ളാമെന്ന് തോന്നി, അതാ പറഞ്ഞത്"
ഇത് കേട്ടതും വാമഭാഗത്തിന്റെ മുഖമിരുണ്ടു.
"ഹും! ഞാന് പുതിയ ഡ്രസ്സിട്ടിരിക്കുന്നു. നിങ്ങളിത് നോക്കിപോലുമില്ല ?"
ഹാവു, പൂര്ത്തിയായി!!
